TOYOTA АВТОКӨЛІКТЕРІНЕ КЕПІЛДІК

Toyota автокөлігіне берілетін кепілдік

Кепілдік бастапқыда Дилерден сатып алынған Toyota автокөлігіне Кепілдік мерзімі кезеңіне беріледі. Көлік иесі Toyota автокөлігінің кемшіліктеріне байланысты Кепілдік мерзімі ішінде Кепілдік талаптарын қоюға құқылы.

Шанақ пен лак-бояу жабынына берілетін кепілдік

Көлік иесі Көлік иесінің нұсқаулығында көрсетілген шанақ пен лак-бояу жабынына күтім жасау ережелері мен талаптарын сақтаған жағдайда Өндіруші Кепілдік мерзімі ішінде Toyota автокөлігінің шанағында өтпелі коррозия және лак-бояу жабынының өндірістік кемшіліктері болмайтынына кепілдік береді.

Toyota түпнұсқа қосалқы бөлшектеріне берілетін кепілдік

Кепілдік Дилерден сатып алынған Toyota түпнұсқа қосалқы бөлшектеріне сатып алған сәттен бастап, автокөліктің жүріп өткен жол қашықтығына қарамастан 12 ай өткенше беріледі.

Toyota түпнұсқа аксессуарларына берілетін кепілдік

Кепілдік Toyota түпнұсқа аксессуарларына оларды Өндіруші орнатқан жағдайда Кепілдік мерзімі аясында беріледі. Егер Toyota түпнұсқа аксессуарлары Toyota автокөлігін сатып алғаннан кейін орнатылған болса, онда осындай Toyota түпнұсқа аксессуарларына кепілдік Toyota түпнұсқа аксессуарын Дилерден сатып алған күннен бастап, Toyota автокөлігінің жүрген жол қашықтығына қарамастан 12 ай өткенге дейін немесе осындай аксессуарлар орнатылған Toyota автокөлігіне қатысты Кепілдік мерзімінің күшінде болу мерзімі аяқталғанға дейін, қайсысы ұзақ созылатынына байланысты қолданылады.

Аккумулятор батареясына берілетін кепілдік

Аккумулятор батареясына берілетін кепілдік, ертерек орын алатынына қарай, 3 жыл немесе 100 000 км құрайды. 3-ші жыл пайдалану кезінде кепілдік арқылы батарея құнының 50 % өтеледі.

Гибрид қондырғылардың компоненттеріне берілетін кепілдік

Гибрид қондырғылардың компоненттері үшін Кепілдік мерзімі, ертерек орын алатынына қарай 5 жыл немесе 100 000 км қашықтықты құрайды.

Гибрид қондырғыларының компоненттері:

- жоғары вольтті аккумулятор батареясы;

- аккумулятор батареясының басқару модулі;

- гибрид қондырғының басқару модулі;

- конвертері бар инвертер.

Жөндеу орталығына жеткізу

Сіздің Toyota автокөлігіңіздің кемшілігі Өндірушінің жауапкершілік саласына кіретін болса, онда Toyota автокөлігіңізді жақын маңдағы Дилерге жеткізу шығыны Кепілдікпен өтеледі.

Жалпы ережелер

Көлік иесі Toyota автокөлігін пайдалану, сақтау немесе тасымалдау ережелерін бұзғандықтан, үшінші тұлғалардың әрекеттерінен немесе еңсерілмейтін күш әсерлерінен болған Toyota автокөлігінің, шанағының, лак-бояу жабынының, Toyota түпнұсқа қосалқы бөлшектері мен аксессуарларының кемшіліктері үшін Өндіруші жауапты емес.

Кепілдік міндеттемелер қалыпты пайдалану кезінде табиғи түрде тозатын және сыртқы әсерлердің салдарынан тез тозатын бөлшектерге, керек-жарақтарға қолданылмайды.

Сонымен бірге өндіруші Toyota автокөлігінің, шанағының, лак-бояу жабынының, қосалқы бөлшектерінің төмендегі жағдайларға байланысты туындаған кемшіліктері үшін жауапты болмайды:

- Дистрибьютор өкілеттік бермеген жөндеу мекемесі немесе Көлік иесі, не болмаса Toyota автокөлігін пайдаланушы тұлға Көлік иесінің нұсқаулығы талаптарын бұзған; немесе

- Toyota маркасына жатпайтын қосалқы бөлшектерді немесе аксессуарларды пайдаланған; немесе

- Дистрибьютордың өкілеттігі жоқ жөндеу мекемесінің тиісті біліктілігі болмаған, немесе ол ұқыпсыздық және абайсыздық танытқан; немесе

- Toyota автокөлігін пайдалануға қатысты Көлік иесінің нұсқаулығы талаптары бұзылған; немесе

- Toyota автокөлігін спорт, жарыс мақсаттарында немесе артық жүктемемен пайдаланған; немесе

- Көлік иесі немесе басқа тұлғалар Toyota автокөлігіне қатысты қасақана немесе абайсыз іс-қимылдар жасаған (мысалы, электр қосылыстарды зақымдауы немесе ажыратуы және т.с.); немесе- Toyota автокөлігімен су өткелдерінен және басқа да су кедергілерінен өткен кезде оның тораптары мен агрегаттары ішіне су кіріп кеткен; немесе

- Toyota автокөлігін түрлендіру немесе оның конструкциясын өзгерту (бағдарламалық құралдарды, зауыттық баптауларды, электрондық блоктардың параметрлерін заңсыз өзгерту, көлік құралының қуатын, конструкциясын және/немесе типін өзгерту); немесе

- климаттық және физикалық жағдайлардың нәтижесіне байланысты жарықтандыру аспаптарының ішінен булануы; немесе

- Дилерден басқа жерде жөндеу немесе реттеу жұмыстары дұрыс жүргізілмеген; немесе

- Өндіруші Көлік иесінің нұсқаулығында белгілеген Техникалық қызмет көрсету жұмыстарының мерзімі бұзылған.

Сонымен бірге кепілдік мыналарға қолданылмайды:

- тек Көлік иесінің қалауы бойынша жасалған, Toyota автокөлігінің кемшіліктерінен туындамаған қосалқы бөлшектерді немесе аксессуарларды, шанақты, лак-бояу жабынын, Toyota түпнұсқа қосалқы бөлшектері мен аксессуарларын ауыстыруға;

- қандай да бір сыртқы әсерлерден, соның ішінде жарық пен сызаттан, тұздан, ағаш сөлінен және бүрлерінен, құс саңғырығынан, бұршақтан, қышқыл жаңбырынан, табиғат апаттарынан болған зақымдарға немесе шанақ коррозиясына;

- жол-көлік апаттары, кедергілердің үстіне шығу салдарынан болған зақымдарға, жол төсемінің ақауларынан болған зақымдарға;

- Toyota автокөлігінің ақауы кезінде Көлік иесіне келген шығындарға, соның ішінде телефон қоңыраулары, басқа автокөлікті жалдау, қонақ үйде тұру, уақыт жоғалту және жіберіп алған пайда және т.б.;

- Toyota автокөлігіне Көлік иесінің нұсқаулығында белгіленген Жоспарлы техникалық қызмет көрсетуге және/немесе Қосымша техникалық қызмет көрсетуге қажетті жұмыстардың, қосалқы бөлшектердің және материалдардың құнына;

- қозғалтқышты, дөңгелектерді орнату бұрыштарын реттеуге, тораптарды, бөлшектерді және агрегаттарды майлауға және тазалауға;

- сүзгілерді және сүзу элементтерін, шамдарды, салқындату және басқа да техникалық және пайдалану сұйықтықтарын, оталдыру және қыздыру білтелерін, балқыма сақтандырғыштарды, форсункаларды ауыстыруға;

- әйнектазалағыш щеткаларын, шиналарды, тежегіш қыспақтары және дискілер/барабандарын, жетек белбеулерін, ілініс дискілерін, амортизаторларды ауыстыруға;

- жылтыратуға, тазалауға және коррозияға қарсы өңдеуге;

- Toyota автокөлігін Көлік иесі нұсқаулығында берілген пайдалану ережелерін бұзу салдарынан қажеттілігі туындаған тораптарды, бөлшектерді және агрегаттарды жөндеуге, реттеуге және ауыстыруға;

- Toyota автокөлігіне Жоспарлы техникалық қызметтің және/немесе Қосымша техникалық қызметтің көрсетілмеуінен, кем көрсетілуінен немесе дұрыс көрсетілмеуінен, сондай-ақ сапасыз немесе Көлік иесінің нұсқаулығында көрсетілген талаптарға сай келмейтін отынды, жағармайды, салқындату және басқа да пайдалану сұйықтықтарын пайдаланғаннан туындаған жөндеу жұмыстарына.